கண்கசக்கி கண்விழித்து
கதிர் பரப்ப
முன்னெழுந்து
மரத்தினால்
செய்த தோணி
ஆழிக்கடலுள்
இறங்கும் ஏணி
கூட்டாக நின்று தள்ள...
ஏலேலோ சொல்லி
வியாளுக்கு தோள்கொடுத்து
தோளாலே தள்ளி
இடுப்புவரை
அலை நனைக்க
விடியுமுன்பே கொடுகி
நிற்பான்
கரைவலை மீனவனோ !
சள்ளை வலை
மீன்மடியும்
கல்லு மந்தும் சரிபார்த்து
குலையாமல்
கயிற்று வலையேற்றி
மூட்டான் கயிறு சுமந்து
வயிற்றுப் பகுதி தாழ்ந்து
போகுமந்த தோணியங்கே !
துடுப்புக்கள் ஒன்றிணைய
மிடுக்காக தோணியோடும்!
அடுக்கடுக்கு அலைகடந்து
நடுக்கடல் அடைந்திடும் !
மீன்கூட்டம் வரும்வரைக்கும்
காத்திருந்து
மானோட்டம் ஓடி வலையாலே
மீன் மறித்து
வளைவுக்குள் வைத்திருக்க
கரையிலே நின்றுகொண்டு
தொடுத்த வலை இழுப்பார்கள்!
உரையிலே பாட்டெடுத்து
அடுத்தவனை வம்பிழுத்து
பாடுகின்ற பாட்டதனை
'அம்பா 'என்பார்கள்!
சாய்ந்திளுப்பர் ,
வலை சரிந்திழுப்பர்,
ஓடியிழுப்பர் ஒரு நேரம்
ஓய்ந்திழுப்பர்!
"தண்டையல்"
தோணியின் "முகரை"யேறி
கைகளாலே சைகை செய்து
வளைவுக்குள் மீன்காட்டி
விரைவாக
இழுக்கச் சொல்வான்.
வடக்கிற்கும் தெற்கிற்கும்
ஒடுக்கச் சொல்வான்
விரிக்கச் சொல்வான் !
வட்டம் சுருங்குகையில்
மீன்கூட்டம் போராடும்
புகுந்தோடும்
உயிர்பிழைக்க
வலை பாய்ந்தோடும் !
பெரும்பாடு பட்டதென்றால்
மடிதாங்கியும்
குத்துக்கம்பும்
விரைவாக வந்துவிடும்
கூடைகள்
சுறுசுறுப்பாய் மீனள்ள !
கரையேறும் மடிக்குள்ளே
அகப்பட்ட மீனினங்கள்
துடிக்கின்ற துடிப்பினிலே
மண் தெறிக்கும்
கண்ணுக்குள்ளே!
பாரை,சூரை ,தோறா
நெத்தலி பெருந்திருக்கை
வாளை ,கிளவள்ளு
முள்ளுக்காரல்,
சாளை ,சூடை பாரக்குட்டி
எப்படித்துடித்தாலும்
அடங்கிவிடும்
நொடிகளிலே!
கூட்டான உளைப்பில்
களைத்த மீனவனோ
ஈரவலை காயவைப்பான்
மீன்கூறி முடியுமுன்பே !
தோணிவரும் கரைக்கு
துவண்டு இழுப்பார் மீண்டும்
தரைநோக்கி!
2013 08 03
எங்களூர் கரைவலை மீனவர் ஒருபாடு
மீன்பிடி பிடிப்பது இப்படித்தான்.
0 கருத்துக்கள்:
Post a Comment